جينا ياصبايا!
دخلت الصالة وكانوا البنات قاعدين فيها, أما الحريم داخل مجلس النساء مع جدتي شعيبية اللي منسدحة على طُراحتها(المَرْتَبة) في الأرض..
وقمت أولول وأتهدد وأتوعد...والبرنسيسة يقظانة داخلة وراي تلوحُ ابتسامة النصرِ في مُحيَاها!!
وإلا ريفان جاية وقالت:جدتي تبيك..وتقول وش هالصياح كله؟!
دخلت مجلس النسا...
جدتي:هاه ياشعيبية؟وش هالعلوم اللي تسوِّد الوجه عنك؟!
أنا:أي علوم؟وأي رياضيات؟هالحين مايكفي هاليقظانة كفختني وفرَّجت علي خليقة الله جاء أبوها يكمل الناقص وضربني!وش تنتظرين إنتي ياجدة بعد؟!بتكملين جميلك وتشحطيني بعصاتك؟!!
جدتي:لا...بس زياد ماقصَّر بعد..أخذ لك بحقك وضرب بنت عمك عشانك..يعني متخالصين..وشهوله زعلانة؟!!
أنا:وش متخالصين؟حتى عمي رهجان طقني!
جدتي:وش تبين ياقليلة الحيا عشان ترضين؟ نطق عمك رهجان؟!
أنا:ماأبي ولاشي...أبي كرامتي ترجع!
جدتي:أي كرامة ياأم كرامة؟!من يوم عَرَفتك وكرامتك ممسوح بها الأرض إنتي وأخوك!فضحتونا لابارك الله في إبليس!
أنا:عاد حب الفضايح وراثة في ذي العيلة بعيد عنك!!
إلا يقظانة داخلة علينا...والمنافقة رايحة لجدتي تبوس راسها وايدينها!!
بس عجبتني جدتي الله يسعدها صدَّت عنها وقالت:ترى ريفان وأمها حكوا لي عن سبب الهوشة...عيب يايقظانة البنت تقط نفسها وتقول بأتزوج فلان...وعيب الوحدة تضرب بنت عمها قدام الناس!
يقظانة:وش أسوي فيها ياجدتي قهرتني!!
جدتي:مايخالف..اضربيها!بس في البيت مو قدام الناس!!
أنا:ايه احشيها ماهي ناقصة!!حق من خلاَّك تشيلين جدتك شعيبية على ظهرك يايقظانة وتلفين بها حول فيلتنا 10 مرات!!
صاحت جدتي على النسوان يطلعون برة وقالت:نادوا لي خلف!
وجاء الوالد...
جدتي:أنا سمعت إن خوانك زعلانين من اللي صار ويبون يسافرون الصبح صحيح؟!!
أبوي:ايه صحيح!
جدتي(وهي تناظرني أنا ويقظانة):الله أكبر..ماعاش مين يفرِق بين عيالي يالخايبات!اسمع ياخلف من بكرة الصبح تنزل السوق وتشتري ذيك التيوس الراهية وتسوي ذبيحة لأخوانك تراضيهم فيها!!!
أنا:يــــــاسلام!هالحين وش دخل التيوس الضعيفة بالموضوع؟!من يوم ماجوا أعمامي وأبوي كل يوم يخترع مناسبات عشان يذبح لهم ذبايح!وش هالأعمام؟مايشبعون لحم؟!
جدتي:شيلوا هالبنت مِن قِدامي لاأذبحها ماكفاني طيحتي في الفراش بسبب أخوك..تجين إنتي بعد وتسمين ابدني!!وتصالحوا إنتي وبنت عمك عيب عليكم كل وحدة منكم ياكبرها بس عقلها مثل اللي في رِجلها!!!!!!!!!
وخرجت قعدت مع بنات أعمامي اللي انقسموا فريقين فريق معاي وفريق مع يقظانووه!!
تعشينا...وقعدنا نشرب الشاي..
ويقظانة تناظرني في القومة والقعدة..وأنا متربعة وقاعدة على الأرض وماغير أقط عليها حكي ودعاوي على نظام إياك أعني واسمعي ياجارة!!
مثال:جِعل الذي يظلم ماتنام عينه!
ياعسى الضيم يذوقه كل حِسَّادي!
ياعسى من بغى لي السوء يرجع كيده بـ نحره!
ريفان:بسم الله!وشفيك انتي صايرة مثل عجوز السوء..متربعة على الأرض وتدعين على مِن راح وجاء؟!!!!
أنا:مِن حر مافيني...يلا يابنات تعالوا نطلع فوق..
إلا فريق الأخت يقظانة قالوا:خذونا معكم ياشعيبية!!
أنا(باستهزاء):استريحوا!ترى أنا منحرفة وراعية علوم بطَّالة!خلكم مكانكم لاأصيبكم بـ عدوى!!
يقظانة(تتمسخر):الحمدلله إن بعض الناس عارفين قدرهم!
وطلعت أنا وغيفة ودعجاء وصهباء وثابتة للصالة فوق أما الباقيات قعدوا مع الأخت يقظانة..
وبالصالة وإحنا قاعدات كنت أتابع برنامج أجنبي مترجم(ماني قايلة اسمه لاتحسبونها دعاية!!)
طالعت فيني دعجاء باستغراب وقالت:هالحين إنتي فاهمة وش يقولون؟!
أنا:أكيد..ماتشوفين الترجمة مكتوبة قدامك؟
دعجاء:إلا شايفتها بس الله يقلعهم يشيلونها بسرعة!!
ثابتة:شكل شعيبية فيها جني!كيف تقرينها بسرعة؟!!
أنا:بالله ماتستحون هذي أعماركم وقاعدين تتهجون الترجمة حرف حرف؟!!!
غيفة:لاتلومينا ياشعيبية!إنتي ربك مِنعِم عليك بأهل عطوك الحق تكملين تعليمك..بس حِنا لنا الله من تتخرج الوحدة منَّا من الابتدائي يسحبها أبوها ويقعدها بالبيت ويقول كافي عليك تفكين الخط وتعرفين الحساب!!!
الصراحة كسر خاطري كلامها!
واستكملت غيفة حديثها:بس بإذن الله أول ماأرجع الديرة بأركب راسي لين مايخلوني أرجع للمدرسة وبأكمل تعليمي وأدخل الجامعة بعد!
أنا:انتي لو تخرجتي من الكفاءة فهذي معجزة!لاتسبقين الأحداث..
صهباء:غيفة صادقة ليش يحرمونا من التعليم؟عمي خلف أخو أبائنا ومتربي معاهم ببيت واحد..واشمعنى هو مخلي بناته على كيفهم وإحنَّا لا؟!!
أنا:هييييييييه انتم!بدينا في الحسد؟!
صهباء:لا مو حسد..بس ماحد أحسن من أحد..المفروض ندرس ونتعلم مثلنا مثل غيرنا
أنا:قوموا قوموا الله يقطع ابليسكم لاتسمعنا يقظانة وشِلَتها ويحسبوني أسَلِطكُم!!
دخلنا غرفتي..قالت دعجاء:تكفين شعيبية افتحي الكومبيوتر علمينا شلون تستخدمينه
وفتحته وقمت أشرح لهم شلون استخدم الماسنجر وأشوف المسجات في الإيميل من صديقاتي..
وعاد هم يتابعوني بشغف وأنا منشكحة ومستانسة مسوية نفسي أستاذة عليهم وأقوم وأفتح لهم اليوتيوب وأشغل لهم مقاطع مضحكة وتركتهم شوي ورحت دورة المياه آثاري الملقوفة ثابتة ضغطت على مقطع(كذا وكذا الله لايبلانا!!!) وانفتح معاها وجيت ولقيت الصمت يسود الأجواء وعيونهم مبحلقة برعب للشاشة ويمكن الوحيدة اللي أحسن منهم دعجاء مغطية عيونها بإيديها ومسوية فتحة تهوية تتفرج منها!!
أنا(بانفعال):الله ياخذكم وش تسوون؟!
غيفة وعيونها تدمع:والله العظيم موب أنا هذي ثابتة ضغطت وطلع لها هالمصيبة!!
إلا ثابتة قعدت عند رجلي وقالت كأنها تِشحذ:تكفين شعيبية تكفين لاتعلمين أحد أبوس إيديك!!
أنا:إلا أنا اللي بأقولكم تكفون لاتعلمون أحد وأروح فيها هالحين بتركب السالفة علي صدق ويقولون شعيبية راعية الدشرة والفساد!!!
صهباء وهي تبكي:قوموا نستغفر لايصيبنا سخط من ربي قوموا...
طفيت الكومبيوتر ولطفت الأجواء وقمت أونسهم بسواليفي ومواقفي الطريفة مع زياد وتذكروا هم سالفة المول...
ثابتة:ياحليلك ياشعيبية كسرتي خاطري يوم كفختك يقظانة!
أنا:لو فيكم خير كان فرعتوا بيني وبينها لكن ماش كل وحدة قالت نفسي نفسي!!!
دعجاء:وهالخبلة مِن يقدر عليها فيها عافية لاإله إلا الله...
أنا:اسكتوا بس لاتِذَكروني...من قوة الطق الكابتشينو اللي شربته طلع من خشمي!!
صهباء:يلا زين سوى فيها زياد أدبها تأديب..ياحظك وراك أخو يدافع عنك..أنا لو تعرض لي أي أحد أظن أخوي بيجي ويضربني معه!!!
-----وبعد السوالف أخذنا النعاس ونمنا ..وصحينا وقت الغدا!!
وكانت ذبايح..رضاوة لأعمامي ووداعية بنفس الوقت لأنهم قالوا إنهم بيسافرون فجر اليوم التالي..
وبعد الغداء جات الدكتورة وطمنَّت جدتي إن نتايج الأشعة تقول إن مافيها كسور..ومافي الا شوية كدمات بظهرها من أثر الطيحة..
وفي العصر نادت جدتي أبوي...
جدتي:أقول ياخلف ضاق صدري من قعدة البيت...ويازين الديرة زيناه هوا ربي يهفني كل ساعة!!
أبوي:ااااها!انتي وش تلمحين له بالضبط؟لاتقولين بتسافرين مع أخواني بكرة؟ترى مابأخليك ...ودي فيك شهر ثاني تقعدينه عندنا!!
ووقتها كنت أشرب الشاي الأخضر ومكيفة عليه بس يوم سمعت كلام أبوي جاني شَرقَة!!
جدتي:بنت ياشويشة لاتموتين علينا!افرحي بكرة بأسافر الديرة...بس ودي اليوم ياخلف نطلع جميع ونروح البر!!
أبوي:يايمه الله يهديك ودك تطلعين وهذي حالتك؟!!
جدتي:وشفيها حالتي؟!ماسمعت الدكتورة وهي تطمني؟!بنروح البر اليوم يعني بنروح البر سمعت؟؟ولا أرفع صوتي؟!
أبوي:لا لا سمعت...بس البر انتم شبعانين فيه بالديرة خل نوريكم بحرنا بتستانسون..
جدتي:على هواك..أهم شي نطلع من البيت!
ومن فرحتي رحت طيران أبشر البنات إنَّا بنطلع...وقابلت زياد في المكان المعهود الباب الخلفي للمطبخ..
زياد:هاه..ياشوشو؟وش عندك؟!!
أنا:أبشرك..بنطلع كِل ابونا للبحر!
زياد:ماعندي عِلم..أنا متفق مع أولاد أعمامي نروح للنادي..
أنا:أي نادي الله يسامحك؟بالله أولاد أعمامك وجيه نوادي..هم والكوافي اللي يلبسونها على رووسهم والثياب اللي أكل الدهر وشرب عليها؟!
زياد:وش عليك انتي؟أصحابي ينبسطون عليهم..يقولون أولاد عمك دبج!بس خفيفين ظل وعلى الفطرة!!
أنا:المهم بغيتك تروح وتشتري لنا شوكولاتات وحلويات عشان ناكلها مع القهوة إذا رحنا البحر..تدري في الخرجات ومع الهواء العليل الواحد يلقى شهيته مفتوحة غصب عنه...!
زياد:ابشري..ولاتنسين.اعتذري لي من يقظانة على علقة أمس!!!!
أنا(بعصبية):ايش تقوووول؟!
زياد:أقول اعتذري لي منها وقوليلها زياد يقول السموحة منك على تكفيخة أمس ولو درى زياد إنك يقظانة كان ضَاعف الجُرعة!!
أنا وزياد:هههههه
---------
واستعدينا ورحنا البحر...وإحنا بنطير من الفرحة التغيير حلو ومطلوب...
فرشنا على الأرض والنسوان جلسوا بصوب وإحنا البنات جلسنا قريب منهم بس على فرشة ثانية والبزران أول ماشافوا البحر انفلتوا كأنهم مسعورين...وأما أعمامي فتفننوا في التصكيك علينا ومحاصرتنا بسياراتهم!!!
قال إيش:نخاف على حريمنا!حشا صار شكلنا كنا قاعدين بغرفة من أربع جدران مابقى إلا يجيبون لنا هليوكوبتر من فوقنا وتصير سقف!!
ورحت سحبت الفرشة وفرشتها ورا وحدة من السيارات وقلت للبنات:ترانا جينا نشم هوا مو نختنق!!
إلا أسمع واحد من أعمامي ينادي:شعيبية؟!
أنا:نعـــــــــم..
عمي:والله إني داري مافي مخالفة إلا ولك إيد فيها!!ارجعوا!
أنا:لا مو راجعة..ماحولنا أحد..والعيال بعيد ويلعبون كورة..وهذا إحنا بـ عباياتنا...
----
نستكمل بإذن الله مع الحلقة الأخيرة..
