السلام عليكم ورحمة الله وبركاته
غالباً تكون فيه وحده من قريباتك او من صديقاتك تكون ملتزمه جداً " ماشاء الله "
للأسف تواجه كثير من المضايقات
لحظه بشرح قصدي حبه حبه
يعني مثلاً :
- فلانه سمعتي الأغنيه الفلانيه ؟
+ لا الحمدلله ما اسمع اغاني !
- يوووووه نسيت انك " مطوعه " - مع ضحكة استهزاء - !
لما تقولين " مطوعه " وش تقصدين فيها ؟
يعني ممكن ردك يكون مشجع اكثر ! مثلاً تقولين " ماشاء الله الله يثبتك ويزيدك من فضله لاتنسينا من دعواتك بالهدايه ولاتنسين تذكرينا كلما غفلنا "
او اي رد افضل والبق ! , يعني ليش في الغالب الناس تفكر ان الملتزمه انسانه ماتعرف شيء !
يعني انها ماتعرف تلبس ولاتعرف تحط ماكياج ولا تعرف تسوي ولا شيء
طيب ليش ؟ وللأسف وجهة نظر او فكرة خااااااااطئه جداً بعد !
او مثلاً لما تشوف وحده لابسه عباية راس خوذي يا استهزاء فيها وضحكات
يعني هي الي سوته مو غلط صح ! اجل ليش كل هذا ؟ ليش يحسسوها انها منبوذه وانها مسويه جريمه !
وطبعاً ما اعمم , على العكس فيه بعض البنات ماتشوفين منهم الا دعوات لها بالثبات ولهم بالهدايه
اممممممم .. امثله كثيره مع الأسف وتبيّن قد ايش تفكير بعض الناس مُنحصر ! والأسوأ لما تجي وتنصحها وتجي ترد عليها /
" ادري ماله داعي تعلميني ! "
ولا مثلاً قالت لها " فلانه قومي صلي مايصلح تأخرين صلاتك "
وتجدين الرد من البعض مع الأسف / " صلاتي لي مالك دخل "
يعني بالله دامك عارفه ان صلاتك لك ليش هالرد ؟ ماتقدرين تشكرينها ع الأقل ! صلاتك لك خلاص انتي عارفه يعني هي وش مصلحتها تذكرك بالصلاة وش تبي منك الا انها خايفه عليك من عذاب ربي سبحانه ..
يعني الآن ليش مع الأسف الكثير ماتسمعين منهم الا " التحطيم , السخريه , الإستهزاء "
لـ المُلتزمه او زي مايسمونها " المطوعه "
هنا الخطأ مُشترك نوعاً ما !
تقولون كيف !
طيب
الحين ليش مانعطي البنات فكره كويسه عن الإلتزام ! , يعني لماتنصحين وحده تنصحين بأسلوب مو كأنك شوي وتطقينها لان كذا تنقلب الدعوه عناد
نفس الشيء احرصي دايم لما تذكرينهم بعذاب الله سبحانه بنفس الوقت ذكريهم برحمته سبحانه في عباده وبنفس الوقت لازم مايتهاونون في أعمالهم ابداً لان الله سبحانه رؤوف رحيم بالعباد كما انه شديد العقاب ,
والجزء الثاني من الخطأ يقع على المُستقبله للنصيحه في اسلوبها
ليش مانرتقي اكثر بأسلوبنا !
طيب مُلتزمه .. , بالعكس إلتزامها دليل على وعيها بينما الناس مُنغمسون ومقبلون على الدُنيا !
مُلتزمه .. , هنا دورك عشان توقفين معها وتحثينها تكمل المسير وتصيرين زيها واحسن في الناحية الدينية
نفس الشي ليش يقولون " مطوعه " مو افضل لو قالوا " مُلتزمه " ؟
لكن للأسف /
" نعيبُ زماننا والعيبُ فينَا "
ربي يفتح على قلوبنا جميعاً ويهدينا .
يمكن موضوعي ماكان قد المقام فمعذره انما هو للتوعيه فقط
واعيد واكرر الملتزمه اكيد تخطىء لانه " جلّ من لايخطىء " ,
يعني المبدأ كَكُل هو الي خطأ الي هو النظره للملتزمه - من البعض - كأنها جاهله ! وكذلك الحكم من المظهر
اتمنى موضوعي وصل
